Matthias Kröner
Dahamm und Anderswo
Gedichte
ars vivendi
Vollständige eBook-Ausgabe der im ars vivendi verlag erschienenen Originalausgabe (Erste. Auflage November 2016)
© 2016 by ars vivendi verlag GmbH & Co. KG, Bauhof 1, 90556 Cadolzburg
Alle Rechte vorbehalten
www.arsvivendi.com
Umschlaggestaltung: ars vivendi, nach einem Bild von Toni Burghart
© Nachlass Erben Toni Burghart
Datenkonvertierung eBook: ars vivendi verlag
eISBN 978-3-86913-964-7
Für Emil · Für Lennard
Inhalt
1 Dahamm
2 Aff dä Fluchd
3 Affm Weech
4 Weid weech
5 Aff verlurner Bosdn
6 Nuned doo
7 Anderswo
Zur Schbrooch (odder: Ä Kabiddl in Konsequenz) – Anmerkung des Autors
Nachwort
Danksagung
Der Autor
1 Dahamm
Briefdräächer
Edz binn i dahamm.
Edz hobb i ä Medzgeri, die mi grüßd,
ä Bäggeri,
die mied mir übers Wedder redd
und änn Briefdräächer,
demm i am Heilichn Oomd ä Drinkgeld gibb.
Wenn i hamm foahr, in mei alde Haimood,
kennd di Medzgeri ned mein Noomer,
wass di Bäggeri nämmer, wer vur ihr schdehd,
und dä Briefdräächer
is wechradzionalisierd woarn.
Woar vylleichd guud,
dass i wech binn – vo derer Gechend.
Schdromleidunger
Dahamm,
doo schbrechn sugoar di Schdaaner,
di Bäum schdeggn dä ihre Sehnsüchd zu,
ä Weiher werd zu ämm ganzn See,
und di Schdromleidunger singer,
wennsd durchläffsd
under ihner.
Dahamm,
doo gibbds änn, der dä zuhorchd,
an dems di abärberdsd,
doo kennsd änn Wind
und doo wassd, wann dä Reeng kummd.
Dahamm,
doo kennsd Godd und di Weld
und desweeng bisd wech,
hie zu andere Schdromleidunger und Schdaaner,
hie zu ämm See,
der ä riesichs Meer is,
hie zu ämm Reeng und ämm Wind,
der ned wass, wersd bisd.
Edz bisd ford.
Edz kennd di kanner mehr.
Edz bisd mied deim Gfredd allaans.
Edz gehd di Ärberd loos.
Wos mir wissn
Kanner wass,
wosser werkli wyll.
Des is äs Broblem vo uns
Menschn.
Jeeder wass,
wosser goar ned mooch.
Des is äs Broblem vo uns
Frankn.
Abwasch
»Andreedn!« hodds ghaaßn,
wenn i miedhelfm hobb solln bamm Abwasch.
Wenn i ned glei äs Gschirrduch gnummer hobb,
hodd mei Mudder »Bewaffne diich!« gsachd.
Und wemmer ferdi woarn: »Edz bisd befreid!«
Wenn i haid, selber Baba,
mied maane zwaa Buum in dä Früh frühschdügg,
und mir sinn widder amol arch schbääd droo,
sooch i »Edz obber zagg-zagg!«
und »Abmarsch!«.
Wie, frooch i di,
wyll mä friedli sei,
wenn si dä Kriech neigschlichn hodd
in di Schbrooch?
Schdorch
Wenn i die scho siech,
wies schdolzierd,
wies endlangschreided,
wies vurbeiläffd
an unserm Küchnfensder,
wenn i äs Essn koch für mein Moo.
Die hodd Zeid.
Die gehd langsam, schee langsam.
Die schdolzierd wie ä Schdorch.
Die hodd ka Gejooch.
Die sedzd änn Fuß vurn andern.
Die wass ned, wos des hassd, wenns bressierd.
Die wass blooß, dass widder amol frei hodd,
di Fraa Oberschdudienräädin.
Alde Schbrooch
Fränkisch schbrechn is wie fränkisch essn,
obber ka Schäuferlä und erschd rechd
ka Broodwörschd,
eher wos Bsonders,
wos blooß manchmool ba maaner Oma geem hodd –
und in ämm aanzichn Lokal
in dä Fränkischn,
des di Kahlfresser längsd scho
wechbudzd hamm.
Mei Haimood (odder: Zwaa vo Achzg)
Doo schdenners:
Achzg Laid ass ämm Dorf in Frankn.
Verzg denner si ned groß ab.
Die sinn, wies sinn.
Die scheern si ned vyll um andere.
Manchmool drenner sä si.
Di Haimood bedaid denner nix.
Zwanzg schdelln Bedongklödz hie
und denner, wos denner müssn.
Wall wenns nix denner, griengs gsachd, werd aa nix.
Desweeng denners und denners
und hamm ka Zeid.
Di Haimood is denner worschd.
Zehn wolln wos erreihng.
Die sinn agdiv in dä Kerch,
im Kindergardn,
im Aldersheim,
in dä Bolidik.
Alles ohne änn Cend, dens sehng.
Denner ihr Haimood is ganz woanders.
Fümbf gibbds blooß nu aafm Babier.
Die schdenner nu drin in di aldn Underloong,
im Geburdsregisder und im Kadasderamd.
Obber die leem längsd in dä großn Schdadd.
Die sinn vo dä Haimood davoo.
Drei gibbds,
die wolln widder änn,
vo demms schbääder soong könner:
Alles woar ned su schlechd.
Der hodd aa saane guudn Seidn ghabbd.
Die hamm ihr Haimood verroodn.
Und dann sinn in demm Dorf nu zwaa Flüchdling:
Maansd werkli, die versaun uns
äs Leem?
Wechgeh, hiegeh
Wennsd di
wo dahamm fühlsd,
geh ford, geh ford.
Blooß dann kummsd
aa werkli weider.
Wennsd di
wo dahamm fühlsd,
bleib dord, bleib dord.
Blooß dann kummsd
aa werkli weider.
Des alde Zaich
Wennsd mied ämm lang gnuch zamm bisd,
därffsd dä immer des alde Gschmarri vo demm oohörn.
Derbei hosd du aa ä Gschmarri,
des dodaal wichdich is.
Dei Gschmarri gecher des Gschmarri vo demm.
Zwaa Gschmarri,
die ghörd wern wolln,
zwaa Gschmarri,
mied denner mä si abdudd,